Македонскиот репрезентативец Никола Серафимов се здоби со повреда на десната рака на синоќешниот натпревар меѓу Славија Софија и Левски Софија.
Стоперот на Левски имаше незгоден пад за време на натпреварот, по што се пожалил на болки во пределот на лактот. Медицинските лица веднаш му укажаа помош, а според информациите од бугарските медиуми, Серафимов бил пренесен во болница во Софија за дополнителни прегледи.
Засега нема официјални информации за точната тежина на повредата, ниту колку време ќе мора да паузира македонскиот фудбалер. Деталните медицински анализи треба да покажат дали станува збор за посериозна повреда и каков ќе биде периодот на опоравување.
Повредата доаѓа во неповолен момент за Серафимов и за македонската репрезентација, која наскоро ја очекуваат натпревари во Лигата на нации. Селекторот Гоце Седлоски ќе ги следи информациите околу состојбата на еден од стандардните дефанзивци во националниот тим.
