Новак Ѓоковиќ се пласираше во полуфиналето на Вимблдон по спектакуларна победа над Феликс Оже-Алијасим со 3:2 во сетови (7:6, 3:6, 6:3, 6:7, 7:6), по маратонски меч што траеше пет часа и 14 минути.
Српскиот тенисер уште еднаш покажа зошто е еден од најголемите во историјата на тенисот, совладувајќи го значително помладиот противник по голема борба и неизвесност до последниот поен.
Првиот сет беше израмнет од почеток до крај и беше решен во драматичен тај-брејк, кој Ѓоковиќ го доби со 12:10.
Во вториот сет Оже-Алијасим заигра поагресивно и со брејк при резултат 4:3 успеа да го преземе водството. Иако се соочи со две брејк-топки, Канаѓанецот ги спаси и со 6:3 израмни на 1:1 во сетови.
Ѓоковиќ возврати во третиот сет. Со брејк при резултат 3:2 ја презеде контролата и без поголеми проблеми го приведе сетот до крај за ново водство.
Четвртиот сет повторно донесе голема неизвесност и беше решен во тај-брејк. Оже-Алијасим беше посмирен во клучните моменти, славеше со 7:4 во тај-брејкот и избори решавачки петти сет.
Во последниот сет повторно немаше брејкови, па победникот беше решен во завршен тај-брејк до 10 поени. Ѓоковиќ одигра маестрално, направи два мини-брејка и со убедливи 10:4 го завери пласманот во полуфиналето на најпрестижниот тениски турнир.
Во борбата за место во финалето, српскиот ас ќе се соочи со светскиот рекет број еден, Јаник Синер.
