Во општина Ѓорче Петров нема да се градат хемиски фабрики! Вака, Александар Стојкоски, градоначалник на општина Ѓорче Петров, ги демантираше изјавите на градоначалничката на Скопје, Данела Арсовска, која обвини дека ваков тип на фабрики ќе се гради на територијата на Општината.
Стојковски смета дека ова е обид на Арсовска да создаде хаос меѓу граѓаните.
-Со тоа што се повикува на изградба на некакви си хемиски фабрики сака да создаде чувство на несигурност во јавноста и паника помеѓу луѓето. Најодговорно тврдам дека на тој потег, ниту пак на било кој друг дел на територијата на општина Ѓорче Петров не постои локација на која што е предвидено да се градат било каков тип на објекти од тешка индустрија, изјави градоначалникот Стојкоски.Претходно Данела Арсовска, преку соопштение на Град Скопје објави дека тие уште во февруари, минатата година, не дале согласност за градба на три индустриски објекти – хемиски фабрики и дополнително над 30 висококатници, со кои ќе се пренатрупал за двојно повеќе бројот на жители дозволени во тој дел на градот.
Арсовска соопшти оти проблемот е што хемиските фабрики планирано е да се градат во заштитната зона Нерези – Лепенец, каде што се бунарите од кои вода пие цело Скопје.