Народниот правобранител Фатон Сељами побара граѓаните на Гостивар, како и жителите на околните општини што се снабдуваат со вода преку ЈП „Комуналец“, да бидат ослободени од плаќање на сметките за вода за периодот во кој таа не смее да се користи. Тој изјави дека препораката ќе биде испратена до Советот на општина Гостивар и до другите засегнати општини, со очекување да биде прифатена. Сељами потсети дека слична одлука претходно била донесена и во Струга, кога водата за пиење била загадена.
Од општина Гостивар велат дека ја разгледуваат можноста, но засега немаат донесено одлука ниту е познато кога Советот ќе заседава по ова прашање. Народниот правобранител отвори предмет за случајот, побара информации од надлежните институции и најави теренска контрола за проверка на состојбата на изворите и водоснабдителните капацитети.
Во меѓувреме, истрагата за загадувањето на водата ја води и Обвинителството, а во притвор се директорката на ЈП „Комуналец“ и двајца раководители, осомничени дека со поставување пумпи внесувале загадена вода во системот, по што околу 5.000 граѓани се разболеа и беше прогласена епидемија. Дополнително, се води истрага и за недовршениот водоводен систем, за кој, според објавените информации, биле потрошени 7,2 милиони евра.
