Најмалку четири лица ги загубија животите во текот на ноќта во нов бран руски напади врз Украина, соопштија локалните власти.
Во Доњецката област, три лица загинале, а уште петмина биле повредени при напад врз градот Славјанск, кој претставува една од клучните точки на украинската одбрана во регионот Донбас.
Во меѓувреме, градот Запорожје бил нападнат со беспилотни летала, при што загинало најмалку едно лице, а седум други биле повредени. Според локалните власти, нападот предизвикал пожар во станбена зграда и во трговски центар, а оштетен бил и објект на образовна институција.
Гувернерот на Запорошката област, Иван Федоров, информираше дека службите интервенирале на повеќе локации погодени од нападите и дека се проценува материјалната штета.
Дополнително, украинските воени власти соопштија дека двајца пилоти загинале по уривање на борбен авион од типот „Сухој-24“ во Хмелницката област во западна Украина.
Од армијата наведуваат дека причините за несреќата сè уште не се познати и дека е започната истрага за утврдување на сите околности поврзани со падот на леталото.
Хмелницката област се наоѓа во западниот дел на земјата, на околу 160 километри од границата со Молдавија.
