Министерството за внатрешни работи распиша централна и меѓународна потерница по 23-годишната Ива Михаилова од Кочани, постапувајќи по наредба на Основниот суд во Кочани.
Според објавата на официјалната страница на МВР, потерницата е распишана во рамки на кривична постапка што се води против Михаилова, а се однесува на кривични дела предвидени во член 300 став 4, во врска со член 297 став 3 од Кривичниот законик.
Со распишувањето на меѓународната потерница, надлежните институции ќе можат да ја побараат и преку меѓународните полициски механизми, со цел обезбедување на нејзино присуство во понатамошната постапка.
Од Министерството за внатрешни работи засега не соопштуваат дополнителни информации за околностите поврзани со потерницата, ниту за понатамошните активности што ќе бидат преземени.
Инаку, случајот предизвика големо внимание во јавноста откако претходно беше објавено дека Михаилова ја напуштила државата, а институциите започнаа постапки за утврдување на сите околности поврзани со нејзиното заминување.
