Кривична пријава е поднесена против шест лица за организирање и реализирање на незаконско посвојување на новородено дете, во случај што го води Националната единица за сузбивање на криумчарење мигранти и трговија со луѓе при Секторот за криминалистички истраги во Одделот за сузбивање на организиран и сериозен криминал.
Осомничени се Ф.А. (63) и Ѓ.К. (57) од Скопје, И.Ш. (35) и Џ.Ш. (35) од Скопје, како и С.Ј. (35) од Куманово и И.А. (38) од Тетово, поради сомнение за сторено кривично дело „трговија со дете“.
Според истрагата, во периодот 2024–2025 година, првоосомничените користеле ранливи социјални и економски околности на мајката и ја убедиле да се откаже од своето новороденче, нудејќи ѝ финансиска помош и бенефиции.
Како што се наведува, мајката С.Ј., која живеела во вонбрачна заедница со И.А., била убедена да го предаде детето за надомест од 500 евра и бесплатни гинеколошки прегледи.
По отпуст од болница, мајката и бебето биле преземени од Ф.А., по што новороденчето било однесено во домот на лицата кои се јавуваат како „посвоители“, И.Ш. и Џ.Ш.
Во текот на истрагата е утврдено и дека на 17.10.2025 година бил склучен договор за заем од 500 евра помеѓу Џ.Ш. и И.А., при што истата сума била исплатена како дел од договорот за незаконското предавање на детето.
Обвинителството оценува дека со ваквите дејствија е извршена тешка злоупотреба и заобиколување на законската процедура за посвојување, со цел стекнување противправна корист.
На осомничените им е определена мерка домашен притвор од страна на судија на претходна постапка.
