Министерството за внатрешни работи ги извести заинтересираните кандидати за прием во Средното полициско училиште дека учениците кои ја завршиле првата или втората година во средните училишта не треба да се отпишуваат од своите матични училишта во текот на процесот на пријавување и селекција.
Од МВР појаснуваат дека сите кандидати потребната документација треба да ја достават во оригинал или како копија заверена кај нотар.
Со избраните кандидати, односно со нивните родители, старатели или законски застапници, Министерството ќе склучи договор за школување, со кој дополнително ќе бидат регулирани процедурите и обврските поврзани со училиштата во кои кандидатите претходно се школувале.
Јавниот повик за прием на 200 ученици во новото државно Средно полициско училиште – Полициска академија за учебната 2026/2027 година беше објавен на 3 јули и ќе трае 15 дена.
Со ова се обновува средното полициско образование во државата по пауза од 26 години, односно по завршувањето на последната генерација од поранешниот Центар за образование на кадри од областа на безбедноста „Елисие Поповски-Марко“.
Новото државно Средно полициско училиште го носи името „7 Мај“, по Денот на македонската полиција. Право на пријавување имаат ученици кои имаат завршено втора година во кое било четиригодишно средно училиште во државата.
Средното полициско училиште – Полициска академија е формирано со одлука на Владата, врз основа на Законот за средно полициско училиште, донесен во август минатата година, со цел надминување на недостигот од формализирано средно полициско образование.
