Иранските фудбалски репрезентативци сè уште чекаат издавање на американски визи за настап на претстојното Светско првенство 2026, при што нивните пасоши се предадени во Амбасадата на САД во Анкара, Турција.
Претседателот на Фудбалска федерација на Иран соопшти дека процесот се одвива во координација со ФИФА, а документите се доставени во американската амбасада во Анкара каде што моментално се наоѓа иранскиот тим.
Иран треба да настапи на Светското првенство во САД, Мексико и Канада, но визите за влез во САД сè уште не се издадени, иако тимот треба да одигра три натпревари од групната фаза на американска територија.
„Сите пасоши се предадени и очекуваме одлука во наредните денови“, изјави претседателот на федерацијата, додавајќи дека се очекува разврска најдоцна до викендот.
Иранската репрезентација планира патување со чартер-лет од Турција кон Шпанија, по што треба да продолжи кон тренинг-камп во Мексико.
Од федерацијата изразуваат оптимизам дека американските визи ќе бидат издадени навреме и дека нема да има дополнителни проблеми околу учеството на тимот на Мундијалот.
Мексико, пак, веќе им има издадено визи на иранските репрезентативци претходно оваа недела.
