Министрите за надворешни работи на Македонија и Бугарија, Тимчо Муцунски и Велислава Петрова-Чамова, ќе имаат можност да одржат билатерална средба во Софија во четврток, во рамки на меѓународната министерска конференција посветена на Коридорот 8.
Според информациите што ги објавуваат бугарските медиуми, конференцијата ќе се одржи на 8 октомври, а домаќин на настанот ќе биде бугарската министерка за надворешни работи Велислава Петрова-Чамова. На форумот е најавено и учество на македонскиот министер за надворешни работи и надворешна трговија Тимчо Муцунски.
Во рамки на конференцијата е предвидена и билатерална средба меѓу двајцата министри, како дел од тековниот дијалог меѓу Скопје и Софија.
Премиерот Христијан Мицкоски денеска изјави дека Македонија испратила дипломатска нота до бугарската страна со барање за билатерална средба, но дека официјален одговор сè уште не е добиен.
Иницијативата за директна средба доаѓа по неодамнешната посета на претседателката на Европската комисија, Урсула фон дер Лајен, на Скопје, при што таа повика на разговори на високо ниво меѓу Македонија и Бугарија.
