Фондот за здравствено осигурување упати итно предупредување до јавните здравствени установи во Македонија кои располагаат со апарати за магнетна резонанца да ги проверат резервите на хелиум и навреме да обезбедат дополнителни количини. Причината е можен прекин во снабдувањето на европскиот пазар и раст на цените, поврзани со актуелните геополитички тензии околу Иран.
Хелиумот е клучен за функционирањето на апаратите за магнетна резонанца, бидејќи се користи за ладење на суперспроводливите магнети. Без овој гас, уредите не можат да работат, што би можело да предизвика сериозни прекини во дијагностичките услуги за пациентите.
Директорот на ФЗО, Сашо Клековски, истакна дека апелот е превентивен, со цел навремено да се спречат евентуални проблеми во функционирањето на здравствениот систем. Тој нагласи дека установите треба да направат проценка и да реагираат додека хелиумот сè уште е достапен на пазарот.
Во моментов, цената на хелиумот е зголемена за околу 30 проценти, а постојат најави за дополнителен раст. Проблемите во снабдувањето се поврзуваат со нарушувања во глобалните синџири на испорака, делумно предизвикани од состојбите во регионот на Персиски Залив.
Хелиумот е редок гас со екстремно ниска температура на вриење од околу -269 степени Целзиусови, што го прави незаменлив за стабилна работа на МР апаратите. За оптимално функционирање, еден апарат може да користи и до 1.700 литри течен хелиум.
Од ФЗО потенцираат дека навременото планирање и набавка се клучни за да се избегнат застои во дијагностиката, имајќи предвид дека магнетната резонанца е една од најважните и најчесто користени методи во современата медицина.
