Собранието на експерти на Иран го избра Моџтаба Хосеини Хамнеи за нов врховен водач на Исламската Република, објави Iran International.
Одлуката следува неколку дена по смртта на неговиот татко, долгогодишниот врховен лидер Али Хамнеи, кој според информациите бил убиен во израелски воздушен напад.
Според истиот извор, процесот на транзиција на власта бил спроведен во услови на силен притисок. Собрание на експерти на Иран, кое поради неодамнешните воени напади врз неговите комплекси заседавало виртуелно, донело одлука со цел да се обезбеди континуитет на власта и политичкиот курс на државата во услови на воена ескалација и надворешни притисоци.
Моџтаба Хамнеи е вториот најстар син на поранешниот лидер и важи за личност со значително влијание во безбедносниот и воениот апарат на земјата.
Во младоста учествувал во Иранско-ирачка војна како припадник на Иранска револуционерна гарда. Неговото влијание дополнително се зацврстило со ангажманот во паравоената организација Басиџ, која имаше значајна улога во задушувањето на протестите по претседателските избори во 2009 година.
Неговото назначување на највисоката верска и политичка функција во земјата, според оценките, претставува сигнал за задржување на досегашниот политички курс на Иран, како кон меѓународната заедница, така и кон домашната јавност.
