Премиерот Христијан Мицкоски денеска изјави дека здравствената состојба на градоначалникот на Општина Карпош, Сотир Лукровски, бара мирување, коментирајќи го неговото едномесечно отсуство од работното место.
Мицкоски одговараше на новинарско прашање зошто Лукровски не е вратен на работа и по истекот на боледувањето кое, според наводите, било одобрено до 30 мај.
На прашањето дали станува збор за злоупотреба, премиерот посочи дека за тоа треба да се произнесе директорот на Фондот за здравствено осигурување.
Во однос на политичката димензија на случајот, Мицкоски истакна дека Лукровски сè уште формално ја извршува функцијата градоначалник на Карпош.
Тој додаде дека, според информациите со кои располага, здравствената состојба на градоначалникот бара мирување и изрази надеж за негово целосно закрепнување и враќање на обврските.
Во меѓувреме, СДСМ побара распишување на предвремени избори во Карпош, обвинувајќи дека граѓаните немаат доволно информации за состојбата и времетраењето на отсуството на градоначалникот.
