Премиерот Христијан Мицкоски денеска изјави дека се очекува системот за водоснабдување во Гостивар постепено да се нормализира, при што водата до крајот на неделата би требало да биде исправна за техничка употреба, а потоа и за пиење.
Тој информираше дека во активностите за санација на последиците од загадувањето се вклучиле и екипи од скопското јавно претпријатие „Водовод и канализација“, кои помагаат во процесот на целосно чистење и стабилизирање на водоводниот систем.
„Ќе треба да се изврши целосно миење на системот и хлорот да се доведе во нормални граници. Очекувам до крајот на неделата водата да биде добра за техничка употреба, а до идната недела и за пиење“, изјави Мицкоски.
Тој додаде дека иако водоснабдувањето е во надлежност на локалната самоуправа, државните институции се вклучуваат поради сериозноста на состојбата и потребата што поскоро граѓаните да добијат безбедна вода.
Гостивар минатиот месец се соочи со сериозна криза во водоснабдувањето, откако по одлука на локалните власти и јавното комунално претпријатие биле поставени потопни пумпи во канал со загадена површинска вода, која потоа била внесена во градскиот водоводен систем со цел зголемување на притисокот.
По овој настан, повеќе од три илјади граѓани пријавија здравствени проблеми, а Основното јавно обвинителство во Гостивар отвори истражна постапка за утврдување на одговорноста.
Анализите на Институтот за јавно здравје покажаа дека земените примероци од површинската вода содржеле значително зголемено присуство на колиформни бактерии, над дозволените граници, поради што водата била оценета како небезбедна за употреба и консумирање.
Дополнително, надлежните инспекциски служби утврдиле дека пумпите биле поставени на локација која не била опфатена со дозволата за користење вода и дека приклучувањето кон водоводниот систем било направено без соодветно одобрение.
Според наодите, приклучокот бил изведен надвор од дозволеното подрачје, а јавното претпријатие немало дозвола за таквата интервенција во системот.
Основното јавно обвинителство Гостивар веќе започна истражна постапка против три лица од ЈП „Комуналец“ – в.д. директорката Артана Асани, техничкиот раководител Леон Нуредини и раководителот на Одделението за водовод, канализација и градежни работи Вадедин Дервиши, за сомнение за сторени тешки дела против животната средина и природата.
