Премиерот Христијан Мицкоски изјави дека опозициите во Украина и Молдавија не работат против интересите на сопствените држави и не ја кочат работата на своите влади, коментирајќи го денешниот почеток на пристапните преговори на двете земји со Европската Унија.
Одговарајќи на новинарско прашање при посетата на индустриската зона Жабени во Битола, Мицкоски направи споредба со состојбите во Македонија, чиј евроинтегративен процес и понатаму е блокиран поради спорот со Бугарија.
„Опозицијата на Украина и Молдавија не работи против своите граѓани и својата влада, не ја кочи сопствената влада и не работи за интересите на туѓи влади коишто имаат поинакви интереси, како што е во нашиот случај“, рече Мицкоски.
Тој додаде дека претходните власти во двете земји успеале да обезбедат консензус за стратешките прашања поврзани со надворешните предизвици, додека, според него, поранешната македонска влада била подготвена да прифати отстапки за да остане на власт.
„Ние нема да очајуваме. Ќе продолжиме да работиме и да испорачуваме реформи што се дел од Планот за раст. Резултати преку ноќ нема. Никогаш не сме ветувале чуда и не сме чудотворци“, истакна премиерот.
Украина и Молдавија денеска официјално ги започнаа пристапните преговори со Европската Унија, откако Унгарија ја повлече претходната блокада за почеток на преговорите со Киев.
Во врска со најавената реконструкција на Владата, Мицкоски рече дека разговорите со коалициските партнери ќе започнат по 17 јуни, односно по одбележувањето на роденденот на ВМРО-ДПМНЕ во Струмица.
