„Апсолутно не поддржувам надворешно мешање во внатрешните политики на Македонија како што тоа беше пред некој ден, но исто така ние како Влада немаме намера ниту сме пледирале да се мешаме во внатрешните и независни политики на било која држава, посочи премиерот Христијан Мицкоски коментирајќи ги неодамнешните протести пред Министерството за правда и најавениот митинг во Куманово за поддршка на српскиот претседател Александар Вучиќ.
Претседателот на македонската влада Мицкоски денеска го осуди и однесувањето на опозициската партија Демократска унија за интеграција која, како што рече, 20 години не успеала да го реши проблемот на студентите што деновиве протестираа за полагање правосуден испит на албански јазик.
Тој додаде дека владата работи за да се обезбеди трајно решение со кое овој, но и низа други проблеми што ги наследиле од минатото треба да бидат решени.
