Премиерот Христијан Мицкоски нагласи дека со шок и неверување ја слушнал вчерашната одлука на Основното јавно обвинителство за гонење корупција и криминал да ја запре истрагата за случајот околу набавката на мазут за ТЕЦ „Неготино“, во кој беа обвинети 13 лица меѓу кои газдите на „Пуцко петрол“, Ратко Капушевски од РКМ и екс директорот на ЕСМ Васко Ковачевски поради немање докази за незаконски активности.
Мицкоски рече дека АД ЕСМ ќе вложи жалба за донесената одлука, по што очекува случајот повторно да биде разгледан, зошто, рече, ако тоа не се случи, Обвинителството дефинитивно го губи својот кредибилитет.
-ОЈО ГОКК со овој обвинител Ислам Абази веќе сме го коментирале и јавноста знае за каков обвинител станува збор. Во текот на вчерашниот ден разговарав со јавниот обвинител Ненад Савески за оваа тема кој ме информираше дека воопшто не бил информиран од Абази за исходот од истрагата, и рече дека по вложената жалба од ЕСМ случајот ќе биде разгледан и вратен на повторно анализирање.
