Премиерот Христијан Мицкоски соопшти дека истрагата за случајот со масовните стомачни тегоби во Гостивар е во завршна фаза и најави дека наскоро ќе бидат објавени причините за инцидентот, како и лицата кои ќе сносат одговорност.
При денешната посета на Општина Дебарца, Мицкоски изјави дека сите надлежни институции активно работат на расчистување на случајот, при што се анализираат мостри од водата, а постапка води и Јавното обвинителство.
„Многу скоро ќе излеземе со информација за тоа што се случило, кој ја дал наредбата тоа да се случи и, се разбира, ќе има одговорност“, изјави Мицкоски.
Премиерот оцени дека е шокантно тоа што, според неговите зборови, некој постапувал крајно неодговорно и несовесно, нагласувајќи дека случајот нема да остане без правна разрешница.
„Не можам да разберам како некој може толку дрско и несовесно да се однесува. За мене ова е шокантно и неверојатно. Но, овој случај нема така да заврши – ќе има одговорност, а таа ќе се утврдува и низ судска постапка“, порача премиерот.
Тој не откри дополнителни детали за текот на истрагата, но истакна дека резултатите од анализите и утврдените факти ќе бидат соопштени на јавноста во најскоро време.
