Австралискиот регулатор за интернет објави дека забраната за социјалните медиуми за деца под 16 години ќе стапи на сила на 10 декември.
Meta почна да заклучува стотици илјади профили на Instagram, Facebook и Threads пред официјалниот датум на стапување во сила на законот, објави Reuters.
Комесарот за е-безбедност, Џули Инман Грант, изјави дека првично била загрижена за „суровиот“ пристап кон блокирање на помладите корисници, но ја поддржала мерката откако постепените регулаторни промени покажале недоволна ефикасност.
„Стигнавме до пресвртна точка. Нашите податоци се валутата што ги движи овие компании, а дизајнот на платформите содржи моќни, штетни и измамнички карактеристики против кои дури и возрасните се борат жестоко. Какви шанси имаат нашите деца“, рече таа.
Законот предвидува казни до 33 милиони американски долари за непочитување, а платформи како Meta, TikTok, Snapchat и YouTube соопштија дека ќе се придржуваат кон забраната.
Околу 96 проценти од австралиските тинејџери под 16 години веќе имаат профили на социјалните мрежи, соопшти eSafety.
Многу платформи им дозволуваат на малолетниците да ги преземат своите податоци, да го избришат својот профил или да го замрзнат додека не наполнат 16 години.
Инман Грант додаде дека лобирањето на платформите вклучувало обид да се влијае врз американската влада, која ја замолила да сведочи пред конгресен комитет за прашањето на слободата на говорот.
