Фудбалската репрезентација на Аргентина се пласираше во четвртфиналето на Светското првенство по неверојатен пресврт против Египет. Актуелниот светски шампион славеше со 3:2 на стадионот „Мерцедес-Бенц“ во Атланта пред околу 70.000 гледачи, иако до 79. минута имаше негатива од 0:2.
Натпреварот донесе вистинска драма, а главна улога имаше Лионел Меси, кој од трагичар по промашениот пенал се претвори во херој на Аргентина.
Египет одлично го започна дуелот и покажа дека нема намера само да се брани. Во 14. минута, Атија испрати прецизен центаршут од десната страна, а Јасер побегна од Ромеро и со одлична реакција го совлада Мартинез за водство од 1:0.
Само неколку минути подоцна Аргентина доби можност за израмнување. Таљафико беше фаулиран во шеснаесетникот, а судијата покажа на белата точка. Одговорноста ја презеде Меси, но голманот на Египет, Шобеир, го прочита неговиот удар и успеа да одбрани.
Со ова Меси испиша неславна историја, станувајќи првиот фудбалер кој промашил два пенали на едно Светско првенство, откако претходно не реализираше удар од белата точка против Австрија.
До крајот на првото полувреме Аргентина имаше неколку големи шанси, Алварез двапати се закани со глава, а Меси ја погоди стативата од слободен удар, но египетскиот голман беше нерешлива пречка.
Во второто полувреме продолжи драмата. Египет во 59. минута постигна гол, но по интервенција на ВАР тој беше поништен поради прекршок во напад.
Сепак, во 67. минута Египќаните стигнаа до втор погодок. По одлична контра, Зико реализираше за 2:0 и го доведе светскиот шампион во исклучително тешка ситуација.
Кога изгледаше дека Аргентина е пред елиминација, шампионскиот карактер дојде до израз во завршницата.
Во 79. минута Меси одлично нафрли од десната страна, а Кристијан Ромеро со удар со глава намали на 2:1.
Пет минути подоцна следуваше нов момент на магија од Меси. Аргентинскиот капитен се ослободи од противничките играчи и со прецизен удар од близина израмни на 2:2.
Египет потоа целосно падна, а Аргентина го направи целосниот пресврт во втората минута од судиското продолжение. Лаутаро Мартинез одлично проби и асистираше до Енцо Фернандез, кој ја затресе мрежата за конечни 3:2.
Со оваа победа Аргентина продолжува меѓу осумте најдобри селекции на турнирот, а во четвртфиналето ќе го очекува победникот од дуелот меѓу Колумбија и Швајцарија.
