Репрезентацијата на Мексико со победа го отвори Светското првенство 2026, совладувајќи ја Јужна Африка со 2-0 во натпреварот од првото коло во групата А, одигран на легендарниот стадион „Ацтека“ во Мексико Сити.
Избраниците на селекторот Хавиер Агире ја оправдаа фаворитската улога и стигнаа до заслужени три бода, искористувајќи ги грешките на противничката одбрана.
Првиот гол беше постигнат уште во деветтата минута. По недоразбирање во одбраната на Јужна Африка, топката стигна до Хулијан Кињонес, кој без проблеми ја затресе мрежата за водство од 1-0.
До крајот на првото полувреме Мексико беше поконкретен противник и создаде уште неколку добри можности, но резултатот остана непроменет.
Клучен момент во вториот дел беше исклучувањето на Ситоле во 50. минута, откако како последен играч во одбраната направи прекршок над противнички фудбалер и заработи директен црвен картон.
Бројната предност Мексиканците ја искористија во 67. минута кога Раул Хименез со удар со глава по асистенција на Роберто Алварадо ги постави конечните 2-0.
Јужна Африка остана со девет играчи во 83. минута, кога резервистот Цване по ВАР-проверка доби директен црвен картон поради неспортски потег без топка.
Во самиот финиш и Мексико остана со играч помалку. Капитенот Сезар Монтес беше исклучен по остар прекршок, па бразилскиот судија Вилтон Сампајо го покажа третиот директен црвен картон на натпреварот.
Со оваа победа Мексико направи важен чекор кон пласман во осминафиналето, додека Јужна Африка уште по првото коло се најде под сериозен притисок во борбата за следната фаза.
