Напаѓачот на Реал Мадрид, Килијан Мбапе, со оптимизам го очекува стартот на новата сезона во Лигата на шампионите, нагласувајќи дека натпреварувањето секогаш носи посебна мотивација.
„Многу сум среќен што повторно ќе играм во Лигата на шампионите. Секогаш пристапуваме кон ова натпреварување со голема мотивација и ентузијазам. Во добра форма сме и нè очекува многу тежок натпревар против Интер, но токму затоа ова натпреварување е посебно“, изјави Мбапе на прес-конференцијата во пресрет на дуелот.
Осврнувајќи се на коментарите за неговиот однос со Винисиус Жуниор, францускиот репрезентативец истакна дека не обрнува внимание на шпекулациите.
„Тоа е само едно мислење меѓу милиони други кога станува збор за Реал Мадрид, најголемиот клуб во светот. Не можам да контролирам сè што се зборува. Имаме иста цел – да освојуваме трофеи. Ги слушаме критиките, се трудиме да бидеме подобри и продолжуваме понатаму“, рече Мбапе.
Во врска со можноста да ја освои „Златната топка“, тој нагласи дека играњето за Реал Мадрид секогаш носи дополнителен притисок, но и привилегија.
„Кога играш за Реал Мадрид, нормално е твоето име да се поврзува со вакви награди. Тоа е признание за секој фудбалер. Ова лето направив историја во најважното натпреварување, но сезоната е долга и има уште многу да се игра.“
На прашањето дали се чувствува како најдобар фудбалер во светот, Мбапе одговори:
„Јас секогаш така се чувствувам, но тоа е лично мислење. Секој има право на свој став. Ова може да биде добра година за освојување на ‘Златната топка’, но победникот го избираат новинарите и тие ќе ја донесат конечната одлука.“
