Министерката за финансии Гордана Димитриеска-Кочоска соопшти дека Република Македонија го задржала кредитниот рејтинг што го оценува кредитната агенција „Фич“, оценувајќи дека тоа претставува значајна потврда за економските политики што ги спроведува Владата.
Во објава на Фејсбук, министерката истакна дека стабилните јавни финансии и поттикнувањето на економскиот раст остануваат главни приоритети на Владата, а токму економските показатели, според неа, придонеле земјата да го задржи кредитниот рејтинг.
Димитриеска-Кочоска посочи дека Македонија започнала со економски раст од 1,6 проценти во првиот квартал од 2024 година, а потоа, благодарение на мерките што биле преземени, во континуитет се бележат стапки на раст од околу и над три проценти. Последниот објавен податок покажува раст на економијата од 4,3 проценти во вториот квартал.
Таа нагласи дека инвестициите се клучен двигател на економскиот развој, при што само во вториот квартал од годинава бруто-инвестициите се зголемиле за 16,5 проценти.
Според министерката, позитивни резултати бележат и повеќе економски сектори. Градежништвото пораснало за 21,9 проценти, индустријата за 3,9 проценти, преработувачката индустрија за 4,1 процент, додека услужниот сектор бележи раст од 2,4 проценти. Во истиот период, извозот на стоки и услуги реално е зголемен за 10,4 проценти.
Димитриеска-Кочоска оцени дека овие резултати се постигнати во услови на глобална економска неизвесност, што, според неа, дополнително ја нагласува стабилноста на домашната економија.
Осврнувајќи се на јавниот долг, министерката информираше дека на крајот од вториот квартал на 2026 година тој изнесувал 58,8 проценти од БДП, односно 10,726 милијарди евра. Во споредба со првиот квартал, јавниот долг е намален за 21 милион евра, додека во однос на крајот на 2024 година е понизок за 2,6 процентни поени.
Таа посочи дека Владата паралелно работи на финансирање на развојни проекти и на навремено сервисирање на наследените обврски. Во вториот квартал од годинава биле исплатени повеќе од 300 милиони евра за дел од еврообврзницата издадена во 2020 година, а од втората половина на 2024 година досега Министерството за финансии сервисирало обврски во вкупен износ од 4,556 милијарди евра.
Дополнително, за камати биле исплатени околу 350 милиони евра.
Министерката нагласи дека Владата ќе продолжи со постепена и кредибилна фискална консолидација, истовремено обезбедувајќи средства за инвестиции и навремено сервисирање на државните обврски.
„Нашата определба за фискална консолидација останува непроменета, но таа мора да биде постепена, кредибилна и усогласена со економскиот циклус“, порача Димитриеска-Кочоска.
