Македонија денеска го одбележува 7 Мај – Денот на македонската полиција, празник посветен на полициските службеници и безбедносните структури во државата.
Датумот официјално е востановен со одлука на Владата од 20 април 1993 година, кога 7 Мај го заменил дотогашниот датум 13 мај. Изборот е поврзан со Смилевски конгрес, кој се смета за почеток на организираната безбедност во Македонија.
Конгресот се одржал од 2 до 7 мај 1903 година во селото Смилево, родното место на Даме Груев. Во пресрет на Илинденското востание, жителите биле организирани во систем за заштита и известување, со стражари и мрежа за навремено предупредување за опасности, позната како „жив телеграф“.
По повод празникот, денеска во кругот на Министерство за внатрешни работи ќе се одржи централна свеченост, на која ќе се обратат министерот Панче Тошковски и директорот на Бирото за јавна безбедност Александар Јанев.
На настанот се очекува присуство на претставници на институции, министри и членови на дипломатскиот кор.
Во рамки на одбележувањето, попладнево пред Градското собрание ќе биде организирана презентација на полициска опрема и возила, каде граѓаните ќе можат одблиску да се запознаат со работата на различни полициски единици.
Подоцна, на „Школка“ во Градски парк ќе се одржи музичко-забавен настан со настап на познати музички имиња.
