Репрезентацијата на Македонија до 20 години претрпе пораз од 2:0 од селекцијата на Соединетите Американски Држави до 20 години во контролен натпревар одигран во Бугарија.
Избраниците на селекторот Александар Таневски одиграа солиден и корисен тест против квалитетен противник, кој послужи како добра проверка на формата и дополнително уигрување на екипата во овој подготвителен период.
Македонската селекција во најголем дел од натпреварот рамноправно се носеше со противникот и успеваше да ја држи резултатската неизвесност, но сепак примени два гола во клучни моменти. Првиот погодок падна во судиското продолжение од првото полувреме, додека вториот беше постигнат во 92. минута од натпреварот.
Нашите фудбалери имаа и свои шанси за погодок, а најзрелите можности ги пропуштија Димитар Данев, Адмир Љатифи и Салим Арифи.
Натпреварот започна со составот: Васил Ташовски, Златко Радески, Андреј Велков, Адис Мурати, Лука Атанасовски, Димитар Данев, Емир Шаботиќ, Салим Арифи, Тео Сандев, Адмир Љатифи и Даниел Диковски.
Во второто полувреме настапија и Стефан Јованоски, Андреј Мурџески, Фидан Шерифи, Димитар Мартиновски, Виктор Делов, Габриел Крстевски, Андреј Стојановски, Мирза Хасиќ, Иван Шириќ, Гоко Спасов, Лука Бојаџиев и Шабан Мемети.
