Натпреварите во Б-дивизијата на Европското првенство за кошаркари до шеснаесет години, кое се одржува во Скопје и Гевгелија, продолжуваат денеска со разигрувањето за конечниот пласман.
Македонската кадетска репрезентација не успеа да обезбеди место во четвртфиналето, откако групната фаза ја заврши со две победи и три порази. Избраниците на селекторот Стојановски сега ќе се борат за пласман од деветтото до шеснаесеттото место.
По завршувањето на групната фаза, македонските кошаркари се преселија во Скопје, каде што натпреварите за пласман ќе се играат во „Т Арена“.
Прв противник на Македонија во оваа фаза ќе биде селекцијата на Ирска. Доколку македонските кадети слават, во следниот натпревар ќе играат за пласман од деветтото до дванаесеттото место против подобриот од дуелот меѓу Унгарија и Финска.
Поразените селекции од овие два натпревари ќе разигруваат за пласман од тринаесеттото до шеснаесеттото место.
