М-таговите за електронска наплата на патарините отсега ќе бидат достапни и преку двата најголеми мобилни оператори во земјава – А1 Македонија и Македонски Телеком, најавија од Јавното претпријатие за државни патишта.
Од претпријатието велат дека целта е електронската наплата да стане подостапна за граѓаните и да се овозможи побрзо и полесно поминување низ наплатните станици.
Наместо досегашното купување само во просториите на ЈПДП или на наплатната станица „Петровец“, граѓаните ќе можат уредот да го набават преку мобилните оператори на 24 месечни рати од по 49 денари.
Корисниците ќе имаат можност да изберат дали патарината ќе се наплаќа директно од банкарска картичка или износот ќе биде додаван на месечната сметка за мобилни услуги.
Директорот на ЈПДП, Коце Трајановски, изјави дека Македонија сè уште заостанува зад соседните земји во користењето електронски системи за наплата, што создава непотребни метежи на патарините.
Тој посочи дека застои се создаваат и кога возачи со електронски картички немаат доволно средства, поради што се намалува протокот на возила на наплатните станици.
Според Трајановски, целта е што повеќе граѓани да користат М-тагови, а моментално околу 36 проценти од наплатата се реализира преку овој систем.
Воедно, најави дека се разгледуваат и идни промени во системот за наплата, меѓу кои и модел според поминат километар, сличен на системот што се применува во Србија.
Таквиот начин на наплата најпрво би се вовел на Коридорот 8, каде што патарината би се плаќала на последната наплатна станица или на излезите.
Трајановски потврди дека засега нема да има промена на цените на патарините.
