Ромелу Лукаку е на чекор од трансфер во Фенербахче, откако турскиот клуб и Наполи постигнале конечен договор за трансферот на белгискиот напаѓач, објавува „Скај Спорт“.
Според информациите, преговорите во последните часови значително напредувале, а договорот меѓу двете страни бил постигнат утрово. Лукаку треба да се пресели во Истанбул за сума од околу шест милиони евра, со можност за дополнителни бонуси.
Со трансферот ќе заврши неговата двегодишна епизода во Наполи. Белгискиот репрезентативец пристигна во италијанскиот клуб во 2024 година, а во сезоната 2024/25 имаше свој удел во освојувањето на шампионската титула во Серија А.
Во Фенербахче, Лукаку ќе има конкуренција за место во стартниот состав од Ведат Муриќи. Косовскиот напаѓач исто така игра на позицијата централен шпиц, па тренерот на турскиот клуб ќе има две искусни опции во нападот.
Доколку трансферот биде официјализиран, Лукаку ќе добие нов предизвик во кариерата и ќе биде едно од најзвучните имиња во турскиот фудбал.
