Кризата на Ливерпул под водство на Арне Слот продолжува. „Црвените“ доживеаја нов удар, откако беа елиминирани од Карабао Купот по убедлив пораз од 0-3 на „Енфилд“ против Кристал Палас. Младата постава на Ливерпул не успеа да се спротивстави на расположените гости, а двата гола на Исмаила Сар во првото полувреме го одредија текот на мечот.
Слот одлучи да направи ротирање во составот, одморајќи дел од стандардните првотимци, па дури тројца тинејџери се најдоа меѓу стартерите. Единствен кој го задржа своето место по поразот од Брентфорд беше Милош Керкез. Иако младите играчи покажаа храброст во воведните минути, нападот беше без конкретен ефект.
Најактивен во нападот беше Федерико Киеза, кој неколку пати се закани кон голот на Валтер Бенитез, но токму Палас беше тој што го отвори резултатот. По слаба реакција на домашната одбрана, Сар стрелаше за 0-1, а само неколку минути подоцна повторно ја искористи несигурноста на Ливерпул за 0-2.
Во второто полувреме, Слот се обиде да внесе свежина со неколку замени и нови дебитанти, но резултатот остана недостижен. Ситуацијата се влоши по црвениот картон на младиот Амара Нало, по што Палас ја искористи бројчаната предност и преку Јереми Пино постави конечни 0-3.
Со ова, Ливерпул ја заврши својата авантура во Карабао Купот многу порано од очекуваното, а притисокот врз Арне Слот продолжува да расте. Дел од навивачите потсетуваат дека минатата сезона успеал благодарение на системот што го остави Јирген Клоп, додека сега, со примената на сопствените идеи и новите скапи засилувања, тимот влезе во серија порази кои сериозно ја нарушуваат атмосферата на „Енфилд“.
