Левица реагира оти советниците на ВМРО-ДПМНЕ и ВРЕДИ во Град Скопје не ја прифатиле нивната иницијатива со која се бараше еден автобуски билет да важи 120 минути од првото валидирање.
Од Левица образложија дека ваквото решение би им овозможило на граѓаните без дополнително плаќање да менуваат автобуси, што е пракса во многу европски градови.
Во меѓувреме, Скопје и понатаму се соочува со проблеми во јавниот превоз, без доволен број автобуси и без нови возила, откако тендерот за нивна набавка повторно пропадна.
Градоначалникот Орце Ѓорѓиевски најавува продолжување на проектот за Брзиот автобуски превоз, но неговата реализација ќе трае неколку години. До тогаш, граѓаните ќе продолжат да се соочуваат со нередовни линии и секојдневни проблеми во јавниот превоз.
