Рускиот министер за надворешни работи Сергеј Лавров изјави дека разговорите меѓу Русија и САД за изнаоѓање решение за војната во Украина се наоѓаат во ќорсокак и дека во моментов нема напредок во процесот.
Во интервју за весникот „Известија“, Лавров оцени дека западните земји со години спроведуваат политика насочена кон ограничување на влијанието на Русија, со цел нејзино ослабување и изолирање на меѓународната сцена.
Според него, Западот настојува соседните држави да ги оддалечи од соработката со Москва и да ги вклучи во геополитички процеси кои, како што тврди, се штетни за нивната стабилност.
Лавров истакна дека исполнувањето на целите на руската воена операција во Украина би придонело за дополнително зајакнување на позицијата на Русија во светот.
Тој потсети и на разговорите што се одржале во Алјаска пред речиси една година, наведувајќи дека Москва ги прифатила американските предлози за решавање на кризата, но дека потоа не следувале конкретни чекори ниту дополнителни активности насочени кон Киев.
Рускиот министер ја критикуваше и Европската Унија, оценувајќи дека европските земји не се подготвени да поддржат решение кое не е под нивно влијание и повторно ја обвини Европа за, како што наведе, русофобичен однос кон Русија.
Говорејќи за односите со Вашингтон, Лавров рече дека Москва останува подготвена за нормализација на односите, но нагласи дека досегашните иницијативи не донеле конкретни резултати.
Осврнувајќи се на состојбите на Блискиот Исток, тој оцени дека САД се соочуваат со сложени предизвици во односите со Иран, додавајќи дека Русија поддржува продолжување на дијалогот меѓу двете земји.
