Основното јавно обвинителство Куманово поведе постапка против 39-годишен жител на селото Черкези, кој е осомничен дека преку социјалните мрежи упатувал навреди и закани кон премиерот Христијан Мицкоски.
Против лицето се води истрага за кривично дело „Загрозување на сигурноста“ според член 144 став 5 од Кривичниот законик.
Од Обвинителството информираат дека е поднесен предлог за определување мерка притвор, поради проценка дека постојат околности кои укажуваат на можност за бегство, како и ризик од повторување на слично однесување.
Како што наведуваат од ОЈО Куманово, осомничениот претходно бил евидентиран и во случаи поврзани со други кривични дела од областа на насилниот криминал, меѓу кои насилство и лихварство, како и со повеќе прекршоци за нарушување на јавниот ред и мир.
Според обвинителството, врз основа на досега прибраните докази постои опасност неговото однесување да доведе до повторување на агресивни испади или можна ескалација кон посериозни кривични дела.
Предлогот за притвор е доставен до судија на претходна постапка, кој треба да донесе одлука по барањето на Обвинителството.
