Надворешната канцеларија за криминалистички работи во Свети Николе поднела кривична пријава против С.В. (55) од Свети Николе, поради сомнение за сторено кривично дело „злоупотреба на службената положба и овластување“.
Според информациите, пријавениот во периодот од 2021 година, додека извршувал функција градоначалник на општина Свети Николе, наводно ги пречекорил своите службени овластувања и постапил спротивно на одредбите од Законот за градење и Правилникот за начинот на издавање одобренија за градење.
Како што се наведува, тој лично изготвил, потпишал и издал одобрение за градење кое не било внесено и евидентирано во електронскиот систем на Секторот за урбанизам, заштита на животната средина, комунални работи и располагање со градежно земјиште при општината.
Таквото одобрение, кое според надлежните е правно неважечко, било искористено од изведувач од Скопје за изградба на објект чија вредност изнесува 15.488.118 денари. Со ваквото постапување, како што се наведува, е причинета штета на нарачателот на работите.
Дополнително, објектот не е впишан во Агенцијата за катастар на недвижности во Свети Николе, бидејќи се води како бесправно изграден објект.
