Москва нема сознанија за наводниот мировен план за Украина кој, според пишувањето на „Вашингтон пост“, го подготвуваат САД и европските партнери, изјави портпаролот на Кремљ, Дмитриј Песков.
„Кремљ ја прочита статијата во ’Вашингтон пост‘ за наводниот мировен план за Украина подготвен од САД и Европа. Меѓутоа, Москва не знае ништо за самиот план“, изјави Песков на прес-конференција, пренесе руската агенција ТАСС.
Портпаролот на рускиот претседател Владимир Путин посочи дека Москва продолжува да ги следи и разгледува прашањата поврзани со можен прекин на огнот во енергетскиот сектор меѓу Русија и Украина, но дека во моментов нема нови информации за напредок во разговорите.
„Во однос на контактите за енергетскиот прекин на огнот, немаме што ново да кажеме. Работата продолжува“, рече Песков.
Според информациите објавени од „Вашингтон пост“, САД и европските држави работат на заеднички предлог за завршување на војната во Украина. Планот, според неименувани извори, би опфатил повеќе сегменти – обновување на Украина, безбедносни гаранции за Москва и Киев, можен енергетски договор и прекин на огнот по актуелната линија на фронтот.
Во написот се наведува дека иницијативата би требало да донесе одредени финансиски и безбедносни придобивки за двете страни и да создаде рамка за понатамошно решавање на спорните прашања, вклучително и територијалните прашања.
Според „Вашингтон пост“, изработката на предлогот била поттикната по средбата на американски, европски и украински претставници на Флорида, каде што биле разгледувани можни чекори за дипломатско решение на конфликтот.
