Меѓу 1.000 и 1.100 хектари со тутун и сончоглед се уништени во силното невреме со град што го зафати подрачјето на Општина Долнени.
Штетите на одредени земјоделски површини достигнуваат и до 100 проценти, а земјоделците велат дека дел од насадите се целосно уништени и нема да можат да дадат никаков принос.
Невремето било проследено со интензивен град, кој според земјоделците бил со големина на орев, како и со силен ветер. Ударите од ветрот дополнително ги оштетиле посевите, а на повеќе места растенијата биле целосно полегнати.
Најпогодени се селата Новоселани и Заполжани, каде што земјоделците пријавуваат најголеми загуби. Сериозни последици има и во Дебреште, Ропотово и Лажани, каде голем дел од обработливите површини се оштетени.
Претседателот на Сојузот на тутунски здруженија, Кире Ристески, состојбата ја оцени како катастрофална, посочувајќи дека многу тутунопроизводители ќе останат без значителен дел од очекуваниот род.
Дополнителен проблем, според земјоделските здруженија, е што голем број производители немаат осигурување за своите насади, што дополнително ја отежнува можноста за надомест на штетите.
Од Сојузот најавуваат дека ќе иницираат промени со кои при склучувањето договори за откуп на тутунот повторно би било задолжително да се склучуваат и договори за осигурување на производството.
Според Ристески, ваквата мерка би овозможила земјоделците барем делумно да бидат обесштетени при природни непогоди и да имаат поголема сигурност во производството.
Земјоделците сега очекуваат надлежните институции да излезат на терен, да направат проценка на штетите и да преземат мерки за помош на погодените производители.
