Претседателот на САД, Доналд Трамп, изјави дека венецуелскиот претседател Николас Мадуро и неговата сопруга Силија Флорес се на пат кон Њујорк, откако ноќеска биле заробени во брза и координирана акција на американската војска во Венецуела.
Трамп наведе дека против Мадуро и Флорес веќе се покренати официјални обвиненија и дека нивниот транспорт кон САД се одвива со хеликоптер и брод. Во изјава за Фокс њуз, тој го обвини венецуелскиот лидер за сериозни злосторства.
„Тие убија многу луѓе, многу Американци, па дури и граѓани во сопствената земја“, изјави Трамп.
Тој откри дека акцијата била планирана да се спроведе пред четири дена, но била одложена поради неповолни временски услови. Според неговите зборови, Мадуро бил заробен во објект кој личел на тврдина, со силно обезбедување и челична заштита.
Трамп истакна дека во акцијата нема загинати американски војници, иако неколкумина биле повредени, но се очекува целосно да закрепнат. Тој ја опиша операцијата како исклучително сложена и спектакуларна, нагласувајќи дека малку држави во светот би биле способни да изведат ваков маневар.
Американскиот претседател откри и дека разговарал со Мадуро една недела пред нападот, при што му порачал да се предаде.
На прашањето дали САД ќе ја поддржат опозициската лидерка Марија Корина Мачадо како можна нова власт во Венецуела, Трамп изјави дека тоа прашање допрва ќе се разгледува, додавајќи дека изборот на Мадуро бил „срам“.
Тој повтори дека САД со години го обвинуваат Мадуро дека стои зад меѓународна мрежа за трговија со дрога и истакна дека со неговото апсење ќе се испрати силна порака. Против венецуелскиот лидер денеска официјално се покренати обвиненија поврзани со дрога и оружје, кои тој досега ги негираше.
