Реформата на државната управа треба да обезбеди воспоставување јасни критериуми за основање органи на државната управа, нивно функционирање и одговорност, нагласи министерот за јавна администрација Горан Минчев на денешната јавна расправа посветена на Нацрт-законот за организација и работа на органите на државната управа кој е објавен на ЕНЕР и отворен за забелешки и мислења.
Според него, целта на новата законска рамка не е само организациска реформа, туку создавање појасен, предвидлив и одржлив систем на функционирање на државната управа, усогласен со принципите на добро владеење и европските стандарди.
Во обраќањето посебен акцент беше ставен и на потребата од јасно разграничување меѓу политичката одговорност и професионалното постапување на администрацијата, односно политичкото раководство треба да ги креира политиките и стратешките насоки, а административните постапки мора да се водат исклучиво врз основа на закон и стручност.
