Јапонските инженери развија необичен уред за справување со екстремните летни горештини – специјална кабина за разладување на луѓе, која за само неколку минути ја намалува телесната температура и може да помогне во спречување на топлотен удар.
Уредот, наречен Do Hiemon Box, е развиен од компанијата SDRS, а го дистрибуира Trusco Nakayama. Кабината по изглед потсетува на автомат за пијалаци, но наместо производи, во неа влегува човек кој се разладува со струење на ладен воздух.
Внатрешната температура е околу 15 Целзиусови степени, додека кон главата, вратот, рамениците и грбот се насочува воздух разладен на околу 5 степени, што овозможува брзо намалување на телесната температура.
Според производителите, по само пет минути престој корисникот чувствува значително освежување, а десетминутен престој може да помогне при симптоми на топлотна исцрпеност. Кабината располага со три режими на ладење и автоматски се исклучува по 20 минути за да се спречи прекумерно разладување.
Дополнителна предност е што троши речиси двојно помалку електрична енергија од класичен мобилен клима-уред и може да се користи и во затворени простории и на отворено.
Уредот е наменет пред сè за градилишта, фабрики, магацини и други работни средини каде што вработените се изложени на високи температури. Во Јапонија веќе е поставен и на неколку јавни локации, каде што граѓаните можат бесплатно да го користат.
Цената на „фрижидерот за луѓе“ изнесува околу 1,5 милиони јени, односно повеќе од 8.000 евра без данок, поради што засега најголем интерес покажуваат компаниите и институциите.
Развојот на оваа технологија доаѓа во време кога Јапонија се соочува со сè почести и поинтензивни топлотни бранови, што ги поттикнува властите и приватниот сектор да инвестираат во нови решенија за заштита од високите температури.
