Новата учебна 2026/2027 година започнува утре за околу 238 илјади ученици во основното и средното образование. Наставата ќе трае до 10 јуни, додека за матурантите ќе заврши на 17 мај, соопшти министерката за образование и наука, Весна Јаневска.
Таа информираше дека учебниците за новата учебна година се навремено набавени и доставени до училиштата.
„Трета година по ред учебниците се обезбедени навреме, во тираж што го побараа училиштата. Испорачани се и уште утре ќе можат да им бидат поделени на учениците. Задоволство ми е што прашањето со учебниците повеќе не претставува проблем како во минатото. Годинава се набавени 622 илјади учебници, а остварени се заштеди од 50 милиони денари во споредба со периодот пред да го преземам раководењето со Министерството“, истакна Јаневска.
Таа посочи дека целосно нови учебници се обезбедени за учениците од прво, второ и трето одделение, за осмо одделение, како и за втора година во гимназиското образование.
Од вкупно 1.023 училишни објекти, во 620 оваа учебна година ќе се реализира едносменска настава. Во меѓувреме, во тек е проширување на капацитетите на 14 училишта во Скопје и во Градско.
За учениците со посебни образовни потреби ќе бидат ангажирани 1.358 образовни асистенти во основните и 166 во средните училишта.
Според податоците на Министерството, новата учебна година ја започнуваат 174 илјади основци и 64 илјади средношколци, додека во прво одделение се запишани 14.952 првачиња.
Поради намалениот број ученици, привремено ќе бидат затворени 26 подрачни училишта, а со оптимизацијата на училишната мрежа укинати се вкупно 433 паралелки – 222 во основното и 211 во средното образование.
„Таквите паралелки ги обединивме, па затоа годинава во образовниот систем ќе има 433 паралелки помалку. Важно е што ниту еден редовно вработен наставник не останува без работа“, нагласи министерката.
Јаневска најави и нов раст на платите во образованието. Според неа, во март 2027 година наставниците и останатите вработени ќе добијат ново зголемување на платите, кое ќе изнесува меѓу 7,5 и 10 проценти, во зависност од стапката на инфлација.
