Градоначалникот на Кавадарци, Митко Јанчев, порача дека „Тиквешкиот гроздобер“ претставува многу повеќе од традиционална прослава, нагласувајќи дека манифестацијата е значајна можност за промоција на Кавадарци и Тиквешијата, развој на туризмот и поддршка на локалната економија.
На свеченоста во Винскиот музеј, Јанчев ги поздрави претставниците на државните институции, дипломатскиот кор, гостите и сите соработници кои присуствуваа на отворањето на манифестацијата.
„Тиквешкиот гроздобер е една од најзначајните традиционални манифестации во Тиквешијата и Кавадарци. Посветен е на лозарите и винарите, но истовремено е и можност да ги промовираме нашиот град, регионот и неговите потенцијали“, истакна Јанчев.
Тој нагласи дека лозарството и винарството се нераскинлив дел од идентитетот на Тиквешијата, потсетувајќи дека генерации кавадарчани со својот труд придонеле за создавање на препознатливите тиквешки вина.
Според него, обврска на сите е оваа традиција не само да се зачува, туку и дополнително да се развива.
„Тиквешкиот гроздобер не треба да го гледаме само како традиционална прослава, туку и како можност за промоција на Кавадарци, развој на туризмот, поддршка на локалното стопанство и создавање нови партнерства и пријателства“, порача градоначалникот.
Јанчев изрази задоволство што годинава манифестацијата обединува гости од различни места, оценувајќи дека ваквите настани придонесуваат за поврзување на луѓето, институциите и градовите.
На крајот од своето обраќање, тој наздрави за успешен „Тиквешки гроздобер“, за добрата соработка и пријателството, како и за континуираната поддршка од Владата, ресорните институции и сите што придонесуваат за развојот на Тиквешкиот регион, лозарството и винарството.
