Соединетите Американски Држави го известиле Израел дека во наредните денови планираат да ја засилат воената кампања против Иран, објави израелската јавна телевизија КАН, повикувајќи се на неименувани израелски и американски безбедносни извори.
Според извештајот, Вашингтон побарал од Тел Авив да не се вклучува во актуелната фаза од ескалацијата, и покрај проценките дека постои можност Иран да изврши напад врз Израел. Наводно, американската администрација стравува дека евентуален израелски одговор врз иранска територија би можел дополнително да го прошири конфликтот.
Во меѓувреме, според истите извори, САД го зголемуваат своето воено присуство на Блискиот Исток. Во изминатите 24 часа во Израел била испратена дополнителна воена опрема и муниција како поддршка за американските борбени авиони.
Израелскиот портал „Вала“ објави дека американската војска планира да распореди околу 100 авиони-цистерни за дополнување гориво во воздух во израелските воени бази и на аеродромот Рамон во јужниот дел на земјата. Дел од леталата, според истиот извор, би можеле да оперираат и од аеродромот „Бен Гурион“ во близина на Тел Авив.
Порталот наведува и дека само во текот на викендот во Израел пристигнале уште 14 американски авиони-цистерни.
Овие информации доаѓаат во период на зголемени тензии меѓу САД и Иран. Засега нема официјална потврда од американските власти за наводите објавени од израелските медиуми.
