Американскиот претседател Доналд Трамп соопшти дека Соединетите Американски Држави постигнале договор со Венецуела со кој ќе обезбедат мнозинска контрола врз повеќе од 65 милијарди барели докажани резерви на нафта.
Трамп договорот го опиша како „најголемиот договор за нафта во историјата на светот“, нагласувајќи дека нема да чини ништо за американските даночни обврзници.
Во објава на својата социјална мрежа „Трут соушл“, Трамп наведе дека преговорите, по негови насоки, ги воделе државниот секретар Марко Рубио, министерот за одбрана Пит Хегсет, привремената претседателка на Венецуела Делси Родригез, како и претставници на приватниот сектор.
„Тие обезбедија мнозинска контрола на САД врз повеќе од 65 милијарди барели докажани резерви на нафта во Венецуела, без никакви трошоци за американските даночни обврзници“, напиша Трамп.
Засега не се објавени детали за договорот. Не е познато кои приватни компании ќе бидат вклучени, како ќе се реализира мнозинската контрола на САД, ниту кога дополнителните количини нафта би можеле да стигнат до американскиот пазар.
Договорот доаѓа речиси девет месеци по соборувањето и апсењето на поранешниот венецуелски претседател Николас Мадуро од страна на американските сили. Оттогаш Вашингтон работи на обновување на производството на венецуелска нафта и на поголемо присуство на американските компании во енергетскиот сектор на земјата.
Во моментов Венецуела произведува околу 1,25 милиони барели сурова нафта дневно, што е значително помалку во споредба со производството од пред неколку децении. Години на недоволни инвестиции, меѓународни санкции и лошо управување сериозно ја ослабнаа нафтената индустрија.
Привремената претседателка Делси Родригез го поздрави постигнатиот договор, оценувајќи дека тој ќе биде важен чекор кон економското закрепнување на Венецуела.
