Иранскиот претседател Масуд Пезешкијан ги обвини САД за „бескрајна лицемерна реторика“, истакнувајќи дека американската блокада, заканите и, како што тврди, кршењето на преземените обврски се главните пречки за вистински преговори меѓу двете земји.
Во објава на социјалната мрежа Икс, Пезешкијан нагласи дека Иран „поддржува дијалог и договор и ќе продолжи со тоа“, но додаде дека „светот ја гледа противречноста меѓу изјавите и постапките“ на американската страна.
Неговите изјави доаѓаат откако американскиот претседател Доналд Трамп најави продолжување на примирјето со Иран, но истовремено ја задржа поморската блокада на иранските пристаништа.
Слична порака испрати и претседателот на иранскиот парламент Мохамад Багер Галибаф, кој истакна дека „целосно примирје има смисла само ако не се прекршува“, предупредувајќи токму на американската блокада на иранските бродови во Ормускиот теснец.
„Повторното отворање на Ормускиот теснец е невозможно со вакво очигледно кршење на примирјето“, порача Галибаф, еден од клучните преговарачи во иранското раководство.
Соединетите Американски Држави одбија да ја укинат блокадата на бродовите што влегуваат или излегуваат од иранските пристаништа, по што Иран ја повлече својата краткотрајна одлука за повторно отворање на теснецот, обвинувајќи го Вашингтон за кршење на условите на примирјето.
Тензиите дополнително се зголемија откако Иран нападна три товарни бродови во теснецот и објави дека запленил два од нив, што дополнително го одвраќа меѓународниот поморски сообраќај од користење на овој клучен светски пловен правец.
Во вакви услови, изгледите за продолжување на преговорите остануваат неизвесни, додека Техеран инсистира дека без укинување на блокадата и прекин на притисоците нема услови за сериозен дипломатски напредок.
