Иран разгледува можност да дозволи поминување на ограничен број нафтени танкери низ Ормускиот теснец, под услов трговијата со нафта да се одвива во кинески јуани, открил висок ирански функционер за CNN.
Изворот додал дека ова е дел од нов план со кој Исламската Република сака да го контролира протокот на танкерите низ теснецот.
Поради тензиите околу Ормускиот теснец, кој е клучна артерија за светското снабдување со енергенси, цените на нафтата се искачија на највисоко ниво од јули 2022 година, односно од летото по руската инвазија врз Украина.
Обединетите нации предупредуваат дека ограничувањата во поморскиот сообраќај низ теснецот ќе имаат „огромно влијание“ врз хуманитарните операции додека трае војната.
„Кога бродовите ќе престанат да поминуваат низ тој теснец, последиците многу брзо се чувствуваат“, изјави Том Флечер, заменик-генерален секретар на Обединетите нации за хуманитарни прашања.
„Храната, лековите, ѓубривата и другите неопходни производи стануваат потешки за транспорт и многу поскапи за испорака“, додаде тој.
