Во третата недела од 2026 година, од 12 до 18 јануари, во Македонија се пријавени 2.062 случаи на грип и заболувања слични на грип, соопшти Институтот за јавно здравје (ИЈЗ). Иако бројот е за 11,2% помал во споредба со претходната недела, интензитетот на вирусот и натаму останува висок.
Според податоците, бројот на заболени е зголемен за 46% во споредба со истата недела минатата година, кога беа регистрирани 1.412 случаи. Во однос на типичната епидемиска крива од последните 15 сезони, бројот на случаи е за 6,9% понизок, но инциденцата останува над неделната граница за средна активност, што укажува на засилена циркулација на вирусот.
Најголем број заболени се на возраст од 15 до 64 години (1.274 случаи). Највисока инциденца, 289,1 случај на 100.000 жители, е забележана кај децата од 0 до 4 години (279 случаи), додека кај децата од 5 до 14 години се регистрирани 243 случаи. Кај лицата над 65 години се пријавени 266 заболени.
Заболени се евидентирани во 29 центри за јавно здравје. Најмногу случаи има во Скопје – 556, следат Тетово (146), Охрид (142), Битола (139) и Куманово (137). Во повеќе помали општини бројот на заболени е под 30.
Многу висока активност на грипот е регистрирана во Дебар, Охрид, Свети Николе и Кавадарци, а висока активност – во Кратово, Штип и Виница. Во поголемиот дел од земјата се регистрира средна до сезонска активност, додека во две единици е евидентирана многу ниска активност на вирусот.
Во текот на третата недела се пријавени два смртни случаи асоцирани со грип: жена од 75 години од Скопје и маж од 69 години од Кавадарци. Двајцата биле хоспитализирани на Универзитетската клиника за инфективни болести и фебрилни состојби во Скопје, имале коморбидитети и не биле вакцинирани против сезонски грип. Лабораториски кај нив е потврден присутен вирус Influenza A.
Податоците од вирусолошкиот надзор покажуваат континуирано интензивно ширење на вирусот, со процент на позитивни примероци над 10% веќе шест недели. И покрај благото неделно намалување на бројот на заболени, надлежните институции предупредуваат дека вирусот на грип останува ризик, особено за повозрасните, хронично болните и невакцинираните граѓани.
