Поранешниот лидер на Ослободителната војска на Косово (ОВК) и поранешен претседател на Косово, Хашим Тачи, е прогласен за виновен и осуден на 25 години затвор од Специјализираните совети во Хаг за злосторствата извршени за време на војната во Косово.
Иста единечна казна од 25 години затвор доби и Јакуп Красниќи, додека Кадри Весели е осуден на 18 години затвор. Реџеп Селими доби единечна казна од 13 години затвор.
На сите обвинети ќе им биде пресметано и времето поминато во притвор, откако беа уапсени во 2020 година.
Судот утврди дека Тачи е виновен по повеќе точки од обвинението, меѓу кои незаконско или произволно апсење и лишување од слобода како воено злосторство, суров третман, тортура и убиство како воено злосторство.
Според образложението на судот, Тачи значително придонел за спроведувањето на заедничката казнива цел, а како член на Генералштабот на ОВК и раководител на Дирекцијата за политички прашања имал важна улога во нејзиното креирање и спроведување.
Во пресудата се наведува дека Тачи, заедно со останатите обвинети, поставувал лица блиски до нив на клучни командни позиции во ОВК, со што имале контрола врз командниот синџир и спроведувањето на планот.
Претседавачот на судскиот совет посочи дека дел од тие лица извршиле кривични дела или знаеле дека такви дела се извршуваат во рамки на заедничката цел.
Во текот на постапката, судот утврдил и дека Тачи лично учествувал во одредени дејствија, меѓу кои апсење, затворање и испрашување на 13 пратеници во Чирез и Бањица.
