Голем пожар избувна денеска во објект на Јужен булевар во скопската Општина Кисела Вода, во близина на Пазарната инспекција и на околу еден километар од центарот на градот.
Директорот на Дирекцијата за заштита и спасување, Стојанче Ангелов, информира дека гори магацин или друг деловен простор, а од запалениот објект се слушале пукотници, кои, според првичните информации, најверојатно се предизвикани од електричната инсталација.
„Од запалениот објект се слушаа пукотници, најверојатно од електрична енергија. Црниот чад се гледа од далеку“, изјави Ангелов.
На терен интервенираат повеќе противпожарни екипи, кои работат на локализирање на пожарот. На местото е присутно и амбулантно возило, а поради олеснување на пристапот до објектот се сечат и дрвја.
Густ чад се издига над овој дел од градот, а мирис на изгорено, според граѓаните, се чувствува во поголем дел од Кисела Вода.
Засега нема информации за повредени лица, ниту за причините за избувнувањето на пожарот. Надлежните институции се очекува да излезат со повеќе детали по завршувањето на интервенцијата.
