Украински беспилотни летала во текот на ноќта нападнаа повеќе логистички центри на руската компанија „Вајлдберис“ во Санкт Петербург, Твер и окупираниот Крим, објави „Киев Индепендент“, повикувајќи се на руски извори. Според руските власти, нападите предизвикале пожари во неколку објекти, а во Новосаратовка, во близина на Санкт Петербург, биле повредени три лица.
Компанијата потврди дека привремено е прекината работата во логистичките центри во Шушари и Уткин Завод, додека поради нападите биле одложени и околу 50 летови на аеродромот Пулково. Ова е петти напад врз објекти на „Вајлдберис“ во изминатата недела, а претходно пожари беа регистрирани и во магацини во Симферопол, Воронеж, Краснодар и Ставропол.
Украинската војска засега официјално не ги коментираше нападите, а независна потврда за сите информации и тврдења не е можна. Украинскиот претседател Володимир Зеленски претходно изјави дека овие логистички центри се користат за снабдување на руската армија со навигациска опрема, компоненти за беспилотни летала и друга воена опрема.
На веб-страницата на „Вајлдберис“ се продаваат и производи со воена намена, поради што компанијата и нејзината основачка Татјана Ким се под меѓународни санкции. Полска ја означи „Вајлдберис“ како еден од најголемите даночни обврзници во Русија при воведувањето санкции во 2022 година.
Санкт Петербург, родниот град на рускиот претседател Владимир Путин, ретко бил цел на украински напади поради силната противвоздушна одбрана, но во последните месеци украинските дронови сè почесто продираат длабоко на руска територија. Аналитичарите проценуваат дека серијата напади врз логистичките капацитети на „Вајлдберис“ можела да предизвика економска штета од најмалку 100 милијарди рубљи, односно околу 1,2 милијарди американски долари.
