Фондот за здравствено осигурување (ФЗО) соопшти дека состојбата со здравственото осигурување на дел од вработените во Министерството за внатрешни работи не е последица на технички проблем или застој во системот на Фондот, туку на неевидентирани уплати на придонесите за одреден период.
Од Фондот појаснуваат дека во системот се евидентирани вработени кои се вратиле на работа врз основа на судски одлуки, а за дел од нив сè уште не е извршена соодветна уплата на придонесите за здравствено осигурување за периодот за кој се пријавени.
„Станува збор за системски воспоставен механизам кој подеднакво се применува за сите правни субјекти во државата. Пријавувањето на вработените, пресметката и уплатата на придонесите се процеси што се спроведуваат преку Управата за јавни приходи, додека Фондот го евидентира статусот врз основа на податоците за извршената уплата“, наведуваат од ФЗО.
Оттаму додаваат дека кога кај одреден работодавач дополнително се пријавуваат вработени за претходен период, потребно е да се направи корекција на пресметката на платите и да се доплатат придонесите за тие лица.
По евидентирањето на уплатата, здравственото осигурување автоматски се активира.
Од Фондот нагласуваат дека не станува збор за поединечна административна одлука или рачно исклучување на осигурениците, туку за автоматизиран процес кој еднакво важи за сите институции и работодавачи.
Во соопштението се посочува дека и самиот Фонд во минатото се соочил со идентична ситуација кај сопствените вработени, што, според нив, потврдува дека системот функционира по исти правила за сите.
Од ФЗО додаваат дека кај институции со голем број вработени, како што е Министерството за внатрешни работи, дополнителното пријавување лица по основ на судски одлуки може да има пошироки последици доколку навремено не се извршат корекциите и уплатата на придонесите.
Во моментов, претставници на Фондот и на Министерството за внатрешни работи се во директна координација за надминување на состојбата во најкраток можен рок.
Фондот апелира до сите институции и работодавачи, при враќање или дополнително пријавување вработени за претходен период, особено врз основа на судски одлуки, навремено да ги спроведат потребните корекции на пресметките и уплатата на придонесите за да не дојде до прекин на здравственото осигурување.
