Холандскиот фудбалски судија Роб Диперинк почина на 39-годишна возраст, а надлежните органи започнаа истрага за околностите под кои настапила неговата смрт.
Холандската фудбалска асоцијација ја потврди веста, изразувајќи длабока тага поради загубата на еден од своите најпознати меѓународни арбитри. Од Федерацијата посочија дека Диперинк бил искусен судија, професионалец и колега кој бил целосно посветен на фудбалот.
Неговото име последен пат беше во центарот на вниманието во април годинава, кога беше уапсен во Лондон поради сомневање за сексуален напад врз малолетно лице, по пријавен инцидент во хотел. По тој случај, ФИФА го отстрани од листата на судии за Светското првенство 2026 година, каде што требаше да биде ангажиран како ВАР-судија во тимот на Дани Макели.
Неколку недели подоцна, британската полиција ја прекина истрагата поради недостиг на докази за понатамошно постапување, а против Диперинк не беа преземени дополнителни правни мерки. И покрај тоа, неговата суспензија од страна на ФИФА остана во сила.
По завршувањето на истрагата, Диперинк изјави дека бил неправедно обвинет и дека целосно соработувал со надлежните институции, вклучително ФИФА, УЕФА и Холандската фудбалска асоцијација.
Неговата ненадејна смрт повторно го привлече вниманието кон случајот, а истрагата за причините и околностите продолжува.
